Prinsesa Beatrix di bishita na Boneiru

prinses-beatrix-80-7.jpg

Su Altesa Real Prinsesa Beatrix di Reino Hulandes lo bishitá Boneiru for di 28 di novèmber te ku 1 di desèmber 2018. E lo bishitá e isla riba invitashon di Fundashon Parkenan Nashonal Boneiru (STINAPA Boneiru), un organisashon no-gubernamental ku ta responsabel pa maneho di parke nashonal na Boneiru. STINAPA ta miembro di e Dutch Caribbean Nature Alliance (DCNA), di kua Prinsesa Beatrix ta patrosinadó.

Djárason 28 di novèmber

Representante di Reino Interino pa Boneiru, Sint Eustatius i Saba, Jan Helmond, i gezaghèber di Boneiru, Edison Rijna, lo risibí Prinsesa Beatrix na aeropuerto.

Djaweps 29 di novèmber

Mainta Prinsesa Beatrix ta bishitá e ofisina prinsipal di STINAPA. Aki e ta haña splikashon di e maneho i protekshon di e parkenan natural na Boneiru ku mester manehá i protehá, esta e Parke Nashonal bou di awa Boneiru i Parke Nashonal Washington Slagbaai.

Seguidamente Prinsesa Beatrix lo bishitá, komo patrosinadó di e Komité Hulandes di UNICEF, e skol Strea Briante. E skol aki ta ganadó di e promé festival di sine di UNICEF den Karibe riba Derecho di Mucha. A establesé e festival aki pa konsientisá muchanan na Hulanda Karibense den un forma aktivo i kreativo di nan derechonan. Prinsesa Beatrix lo wak e pelíkula di e muchanan huntu ku nan i despues lo bai den diskushon ku nan.

Atardi Prinsesa Beatrix lo asistí na e simposio ‘Ekonomia i Naturalesa den balansa’. E simposio, organisá pa DCNA ta profundisá riba e área di tenshon entre maneho i mantenshon di naturalesa i e desaroyo di turismo. Aparte di spich un diskushon di pènel lo tuma lugá. Ta klousurá e promé dia ku un resepshon den e residensia ofisial di gezaghèber Rijna.

Djabièrnè 30 di novèmber

Mainta Prinsesa Beatrix lo bishitá e Parke Nashonal Washington Slagbaai; e promé reserva di naturalesa den e Antia Hulandes anterior i establesé na 1969. E parke di 5.643 hèktar ta ofresé un ambiente sigur di bida pa espesienan di animal protehá di Boneiru manera, lora, flamingo, prikichi i yuana. Banda di esei e playanan ta un área importante di brui pa kuater espesie di turtuga di laman ku ta biba den e region di Karibe.
Despues di un resepshon i rekorido dor di e sentro di bishitante, lo mustra e parke den djip. Despues di e bishita e Prinsesa lo papia ku e rangers-, investigadó- i kolaboradónan di Parke Nashonal Washington Slagbaai.

Atardi Prinsesa Beatrix ta bishitá Hòfi Kultural; un inisiativa kultural di abitantenan, ku Oranje Fonds a hasí posibel. Na Hòfi Kultural abitantenan por topa ku otro i siña konosé otro mihó dor di praktiká arte huntu. E Prinsesa lo papia ku e inisiador- i bishitantenan di e Hòfi Kultural i lo desvelá un opheto trahá di palu.

Djasabra 1 di desèmber

Ta klousura e bishita na STINAPA ku asistensia na un debate di STINAPA Junior Rangers; e programa pa hóbendi e organisashon. Pa aproksmadamente 10 aña hóbennan ta risibí entrenamentu semanal pa siña tokante e flora i founa partikular riba e isla i e importansia di maneho i mantenshon di naturalesa. Nan ta e embahadornan di naturalesa di i pa Boneiru.

Junior Rangers ta organisá un debate anual komo parti di nan entrenamentu. E aña aki e tema ta: ‘Desaroyo duradero lo stroba òf yuda e ekonomia di Boneiru’. E Prinsesa ta asistí na e tandanan di debate i e defensa final. Despues e lo topa ku e Junior Rangersnan, nan guianan i boluntarionan di e programa pa hóbennan.

DCNA

DCNA ta un relashon di kolaborashon regional entre seis organisashon di parke di naturalesa di e islanan Hulandes Karibense. E organisashon ta okupá su mes ku sosten i fortifikashon di e protekshon di naturalesa riba e islanan. Banda di e promoshon di e naturalesa spesial, e ta enfoká riba maneho duradero di e áreanan aktual ku ta protehá, kombatimentu di pobresa, kresementu ekonómiko i e oumento di konsiensia i konosementu di e balor di naturalesa. Tur esaki pa protehá e rikesanan biológiko amplio di e islanan riba tera i den laman i pa mantené nan pa e generashonnan binidero.

Programa Edukashonal di arte na Boneiru i Kòrsou

Le Mur Toulon Kayna Zuid Frankrijk website.jpg

Fundashon Plataforma Kultural ta organisando un programa edukashonal di arte ekstensivo pa sentenáres di alumno di skol sekundario na Boneiru i Kòrsou. Maestronan di skol por baha e programa edukashonal na www.hofikultural.com/edukashon. Di òktober 2018 te ku yanüari 2019 alumnonan di enseñansa sekundario lo risibí formashon di parti di artistanan di bishita i nan influensia riba e islanan i partikularmente e artista hulandes Dolf Henkes (1903-1989). E alumnonan lo traha diferente mural bou di guia di artistanan profeshonal. E proyekto ta parti di Henkes on Curaçao. Lo tin un eksposishon di un selekshon ekstensivo di obra di e artista di Rotterdam Dolf Henkes na Kòrsou. Apertura lo ta riba 22 di sèptèmber 2018 dor di Minister Marilyn Alcalá-Wallé (solamente pa prensa i famia).

Kuminsando òktober 2018 e artista di kaya Vinz.100 di Rotterdam lo ta na Boneiru durante sinku siman. E lo bai hospedá na BonAIResidence, un fasilidat nobo pa artista den residensia, pegá ku sentro kultural Hòfi Kultural na Antriol. Vinz.100 lo kuminsá duna tayer na Hòfi Kultural despues di fakansi di regata. Hóbennan di SGB, Forma i Jong Bonaire lo partisipá na e programa. Seguidamente, Vinz.100 lo bai traha diferente mural huntu ku e hóbennan na Boneiru.

Na Kòrsou lo tin tres eksposishon di obranan di e artista di Rotterdam Dolf Henkes den Museo Curaçao, Instituto Buena Bista (IBB) i Museo Marítimo Curaçao. Pa di promé biaha for di tempu ku Henkes a bishitá e isla, a barka mas ku 30 kuadro di Dolf Henkes di Hulanda pa Kòrsou i nan ta den eksposishon kompañá pa obranan di arte for di kolekshonnan di Kòrsou i di artistanan kontemporáneo. Henkes on Curaçao ta tuma lugá for di 25 di sèptèmber 2018 te ku 12 di yanüari 2019.

Maestronan di diferente skol sekundario na Kòrsou lo usa e programa edukashonal den klas i nan lo bishitá e eksposishonnan. E alumnonan lo sera konosí ku historia di arte di Kòrsou, ku e influensia di artistanan di bishita den Karibe i muralnan. E alumnonan lo diskutí tokante diferente tabú ku e obranan di arte ta ekspresá. Despues di esaki, studiantenan di IBB lo bai traha mural ku alumnonan di skol na Kòrsou. Riba 21 di sèptèmber 2018, lo tuma lugá un simposio ku charla kòrtiku na IBB, tokante artista di bishita. Pa inskribí mester manda un mensahe na info@institutobuenabista.com. E simposio ta kuminsá pa 2.30 pm.

Fin di 1945, e artista di Rotterdam Dolf Henkes (1903–1989) a barka bordo di un barku rumbo Kòrsou. Tur kos di e isla a hasi un impreshon grandi riba dje despues di e temporada skur di guera na Hulanda e kolónan, e lus, bida diario. El a tuma e karakterístikanan i temanan di e isla i a hinka nan den su propio idioma distinto, moderno. Kòrsou a konkistá su kurason i tabatin un influensia duradero riba su trabou. E mes na su turno a laga markanan bisto di su bishita na e isla, inkluso dos mural enorme, den e kapèl di Sint Elisabeth Hospital i na aeropuerto Hato.

E programa edukashonal na Kòrsou i Boneiru a bira posibel grásias na aporte (finansiero) di Fonds 21, Fundashon Henkes i di Rijksdienst voor Cultureel Erfgoed di Hulanda.

Henkes on Curaçao ta organisá pa Fundashon Henkes i Rijksdienst voor Ciltureel Erfgoed di Huland huntu ku nan partnernan Museo Curaçao, Instituto Buena Bista (IBB), Museo Marítimo Curaçao i Fundashon Plataforma Kultural (pa e elemento edukashonal). E proyekto a bira realisabel grásias na fondonan Mondrian Fonds i supsidio di Banko Sentral di Kòrsou i Sint Maarten, VanEps Kunneman VanDoorne i Powerhouse Company, i tambe sosten di Museo Boijmans van Beuningen.

Manteniendo historia di Boneiru na bida pa medio di Konta Kuenta

20180628_111052.jpg

Fundashon Plataforma Kultural ta organisá aktividat por tur kategoria di edat. Un di e aktividatnan akí ta Konta Kuenta. Tur djaweps traimèrdia tin un grupo di personanan di edat ta wak pòrtrèt ku tin den archivo di pòrtrèt di Boi Antoin, pa bai konta otro storia di e dianan di pasado i asina drenta den tur sorto di memoria. 

Pascolita ta un di e personanan ku ta bin Konta Kuenta tur siman. E ta gusta di rebibá memoria i rekonosé hende riba pòrtrèt, manera famia. Despues di kada bes el a siña algu nobo, e ta splika. Pasando den fail i pòrtrèt bieu i papiando di nan ta tene su memoria spièrtu spièrtu.  

Konservá konosementu

Segun Pascolita mester entrevistá hende grandi mas biaha pa konservá konosementu di ántes, promé ku esaki disparsé. Hopi hóben no konosé e historia di nan grandinan na Boneiru; kon nan a biba i kiko nan tabata hasi di dia pa dia. E generashon bieu tin asina tantu konosementu, ku esaki lo bo keda sorpresá kuantu kos nan por konta i asina duna konosementu tokante e kultura bieu i kustumbernan di e Boneiru di ántes. 

Pascolita ta haña un lástima ku bo ta mira asina tiki mucha hunga riba kaya. Kasi ta parse ku mayoria di mucha ta sinta hunga riba nan telefòn so awendia. E tin gana di mira hende invitá nan yunan ku ñetunan pa e tipo di enkuentronan akí, pa siña nan wega di ántes, di manera ku ta introdusí e muchanan na nan atrobe. Weganan manera Djèks, Tapa Kara, malbu, ‘Annemaria Kukuk’ etc. 

Kustumbernan di Tempu Bieu

Rekordando e tempu ku a biba na kunuku ku tabata nèt e bida di e boneriano; Pascolita ta konta kon plantamentu, kohe awa for di pos, kushiná kuminda riba kandela pafó riba kandela ku tres piedra di fogon; tabata parti di e bida diario. Sin frishidèr, tabata konservá bo mes karni, tabata sòru pa bo mes kuminda na lugá di bai supermerkado manera nos ta hasi aworakí. Sabiendo ki momentu mester planta i kosechá segun e posishon i siklo di luna. Ta zona manera tabata hopi tempu pasá, pero no ta asina. Pascolita ta un tiki preokupá ku si no traspasá e konosementu akí pronto, e lo disparsé pa semper. Kompartiendo storia di kon tabata pa biba den tempu bieu riba nos isla ta un grandioso manera, pa lanta interes di e hóbennan, di manera ku nan ta bai siña tokante nan grandinan, nan historia i kultura. Un historia ku nan no ta siña na skol tur ora. Siña tokante e músika ku nan tabata toka i e sorto di baile ku nan tabata balia. Pero mas importante, ta pa laga diferente generashon hasi kontakto ku otro i siña di otro. Pa medio di Konta Kuenta e generashon mas bieu por traspasá su konosementu pa hasi e hóbennan entusiasmá pa siña mas di manera ku nan tambe por traspasá esaki pa otro. 

Pascolita ta hopi kontentu ku Fundashon Plataforma Kultural ta pone un espasio disponibel unda hóbennan ta haña oportunidat pa siña hopi kos manera músika, baile i historia di Boneiru. Anto mientrastantu, e lo skucha, papia tokante e tópiko i kompartí rekuerdo na e aktividat di Konta Kuenta di kada siman ku ta kuminsá atrobe despues di fakansi grandi. Tira un bista riba nos wèpsait i página di Facebook pa mas informashon tokante e fechanan.  

FORMA i músika

Forma music.png

E studiantenan básiko di FORMA a partisipá na un programa di músika na Hófi Kultural, basá riba un kuríkulo variá. Durante e programa akí, nan a traha riba músika i riba letra ku influensia di diferente estilo di músika durante un periodo di tres luna. Nan tabata bou di guia di Juamar Nicolaas “Manjam” (spesialisá den rèp) i Jonathan Martijn (spesialisá den folklor). Tin tambe dosente invitá a partisipá ku a bin duna kontribushon na formashon di e alumnonan pa yega na familiarisashon ku diferente estilo, manera músika ku influensia afrikano. E proyekto akí, ku a pone énfasis riba outo-ekspreshon i riba ekspresá bo mes pa medio di músika, a produsí dos kantika. Por skucha esakinan riba Soundcloud (Bon Irie): https://soundcloud.com/bon-irie.

Nos no por a logra esaki nos so!

20171020_140248.jpg

Hòfi Kultural ta konsistí di algun edifisio remarkabel ku ta duna espasio pa un kantidat grandi di aktividat pa tur edat. A embolbí hopi hende i instansia den e konstrukshon di Hòfi Kultural for di base bai ariba, i ainda esaki ta kontinuá. Fundashon Plataforma Kultural nunka lo por a logra manehá esaki riba su propio forsa so. Grásias na e spònsernan i otronan, e fundashon ta kontinuá krese i konstruí. BonNed i Bonaire Building Management ta dos di e spònsernan akí i gustosamente nos ke introdusí boso na e personanan tras di e kresementu i konstrukshon akí.

Koperashon ekselente

Banda di maneho di su propio kompania Bonaire Bouw Management, Isandro Wanga ta tambe supervisor di konstrukshon pa BonNed. Erik van Wordragen, direktor di BonNed, a aserká Isandro pa kolaborá ku e proyekto di Hòfi Kultural. Denter di e konstrukshon di Hòfi Kultural, BonNed tabata enkargá ku mayor parti di konstrukshon, ku oranan di trabou di Isandro ku pa mayoria parti tabata hinká den organisá, konsehá supervisá i kordiná. Su tareanan a hasi posibel ku BonNed por a enfoká solamente riba su propio tareanan sin tin mester di preokupá ku e sobrá. Esaki tabata un manera hopi plasentero pa a kolaborá ku tur e partidonan segun Isandro. Tur hende tabata embolbí den pensa huntu i pa medio di un grupo di WhatsApp ku a krea pa e meta akí, komunikashon denter di e grupo a kana suavemente. 

DSC_0647.jpg

Isandro a sinti su mes inkreiblemente embolbí den e proyekto i a disfrutá di e echo ku e tabatin oportunidat pa hasi uso di su konosementu i abilidatnan ku e sobresalí kuné. Hasiendo uso di su ret di kontakto, e ta purba di inspirá otro persona pa spònser fundashonnan non-profit òf stimulá otro pa kobra preis redusí pa nan trabou den e kasonan akí. “E benefisio di e manera di traha akí ta, ku bo ta drenta den kontakto ku persona di diferente sektor, esaki ta un gran kos pa nòmber di bo kompania,” segun Isandro. Un bentaha agregá! Isandro ta sostené meta di e fundashon kompletamente i e ta mira su mes partisipá den un di su aktividatnan, manera toka kuarta òf balia wals, mazurka i simadan ora ku e ta un tiki mas grandi. 

Un manera diferente di bira spònser

A base di e volúmen grandi di e kompania, BonNed frekuentemente ta den publisidat i ta tambe frekuentemente aserká pa skol, stazjèr i persona ku ta buska spònser. Ta pa e kapasidat akí Hòfi Kultural a invitá Erik tambe, pa bin tira un bista na e sitio i pa wak loke otro a logra kaba, pa loke ta trata e konstrukshon. “Tur kos tabata na mitar kaminda di keda kla, i e fundashon a puntra si nos por a spònser ku forsa laboral, konseho i material pa pusha e trabou den bon direkshon,” Erik ta bisa. Definitivamente e tabata interesá i inmediatamente a hinka Isandro den e proyekto. Konhuntamente nan a sondia e mihó manera pa atendé ku e proyekto ku su fondonan limitá i ku e materialnan ku tabata disponibel kaba. E meta tabata pa hasi e trabou práktiko i funshonal. BonNed a spònser ku material, mashin i deskuento. Erik ta buska forma ainda den kua BonNed por yuda e fundashon e aña akí ainda.

DSCN9054.jpg

BonNed a spònser hopi fundashon – riba tereno di, por ehèmpel, deporte i karnaval – pero Erik ta konsiderá Hòfi Kultural un kaso diferente. “Ora ta trata di un inisiativa manera Hòfi Kultural, tin hopi aspekto diferente ta bin dilanti ku hopi fundashon di deporte no tin. E tin komo meta un otro tipo di embolbimentu; aki ta trata mas tantu di hende, músika i kultura,” Erik ta splika. E proyekto akí ta inkluí tambe e aktividat di konstrukshon riba su mes, ku a hala ámbos persona bini aserka. Erik ta hopi entusiasmá di e perseveransia di e personanan embolbí den e fundashon, ku ta purba di alkansá un grupo grandi di persona di un manera simpel. Esaki a duna Erik i su kompania un empuhe inmenso pa sostené e fundashon, i di kurason e ta spera ku Hòfi Kultural lo yega hopi leu. E lo gusta ku aki 10 aña, e lo por konstatá ku BonNed a krea komienso di un fundashon eksitoso i ku e tereno lo ta kompletamente yená ku edifisio. E ta deseá e fundashon tur klase di éksito i BonNed tin gana di mira Hòfi Kultural sigui desaroyá.

Fundashon Plataforma Kultural ta inmensamente agradesido na Erik, Isandro, i tur otro ku a kontribuí na e proyekto pa nan ayudo, konseho i tempu! Masha danki tur hende! 

Si bo ta kurioso pa ta na altura di e desaroyo di Hòfi Kultural? Bo ta liber di pasa tira un bista kualke dia, òf bin djòin un di aktividatnan ku Hòfi Kultural ta organisá. Bishitá www.hofikultural.com/new-events pa mira tur fecha i orario.

Isandro Wanga (Bonaire Bouw Management)
Isandro ta guia proyekto di konstrukshon na lugá di konstrukshon, ta planeá, manehá kompra di material, i ta organisá e staf. Por aserká Isandro ora bo ke konstruí un kas, por ehèmpel. E ora ei, e ta traha un plan pa supervishon di e proyekto di konstrukshon. Tambe e ta duna konseho finansiero, ta asistí ku inspekshon di kas, ta determiná e status i ta traha un bista di e gastunan di posibel restorashon.

Erik van Wordragen (BonNed)
Algu ku a start un tempu pasá na Sint Maarten a kontinuá na Boneiru 11 aña pasá. For di e tempu ei, Erik van Wordragen tabata na kabes di BonNed, ku a krese i bira un di e kompanianan di kontratista di mas grandi na Boneiru. BonNed ta ofresé trabou di konstrukshon riba tur tereno: konstrukshon nobo, renovashon, infrastruktura, i e kompania tin te hasta su mes divishon di karpinteria. E diversidat akí ta nesesario riba un isla chikitu manera Boneiru, kaminda no ta sano pa ta dependé di un opshon so, Erik ta splika.